ၵပ်းသိုပ်ႇပၼ် ၸုမ်ႈၶူး B.Aလိၵ်ႈလူင်

ၸၼ်ႉၸွမ်ပုတ်ႉထမိူင်းတႆး သိုပ်ႇၶတ်းၸႂ်ႁပ်ႉဢဝ်လုၵ်ႈႁဵၼ်း တႃႇၸုမ်ႈၶူး B.A လိၵ်ႈလူင် ဢၼ်ပူင်သွၼ်ၽၢႆႇတႆး ၼႂ်းပီၵၢၼ်ႁဵၼ်း 2024-25 ထႅင်ႈယဝ်ႉ။ ၸၼ်ႉၸွမ်ပုတ်ႉထမိူင်းတႆးယိူင်းဢၢၼ်းၶႂ်ႈၽိုၵ်းပၼ်လုၵ်ႈႁဵၼ်းၶဝ် ႁႂ်ႈမီးၼမ်ႉၵတ်ႉမေႃတႅမ်ႈမေႃႁေႃးလိၵ်ႈလူင်
လီလီ၊ ႁႂ်ႈမီးၼမ်ႉၵတ်ႉမေႃလဵပ်ႈႁဵၼ်း သွၵ်ႈဢဝ်တၢင်းႁူႉ ၼႂ်းပိတၵၢတ်ႈ၊ ႁႂ်ႈမီးၼမ်ႉၵတ်ႉ
မေႃၶူၼ်ႉၶွႃႉႁႃထမ်း ဢၼ်မီးဝႆႉၼႂ်းလိၵ်ႈလူင်ၼၼ်ႉ မႃးၸႂ်ႉတိုဝ်းၸွမ်းၼႃႈၵၢၼ်ၵူႈဝၼ်း။လိၵ်ႈလူင်ၼႆႉၸမ်ႉ ပဵၼ်ထမ်းဢၼ်ၶူးမေႃတႆးၶဝ် ဢဝ်ႁႅင်းတူဝ်ၸႂ်သေလႄႈ တႅမ်ႈၸႂ်ႉတိူဝ်းမႃး ပၢၼ်သိုပ်ႇပၢၼ်။ ၼင်ႇႁိုဝ်လိၵ်ႈလူင်လႄႈ ၽိင်ႈလိၵ်ႈလူင် တေဢမ်ႇႁူင်ႈႁၢႆၵွႃႇၼၼ်ႉ ၸၼ်ႉၸွမ်ပုတ်ႉထမိူင်းတႆး ၸင်ႇလႆႈဢဝ်လၢႆးပၢၼ်မႂ်ႇလႄႈၽႃႇသႃႇလၢႆပိူင်သေ ပူင်သွၼ်ပၼ်လုၵ်ႈႁဵၼ်းၶဝ် ဢမ်ႇထၢတ်ႇဢမ်ႇဝၢႆး။ ၵွပ်ႈၼၼ်လႄႈ ၽူႈသူၼ်ၸႂ် ၶႂ်ႈၶိုၼ်ႈႁဵၼ်းသွၼ် ဢဝ်ၸုမ်ႈၶူး B.Aၼႆႉ တၢင်ႇၾွမ်ႇထိုင် ၸၼ်ႉၸွမ်ပုတ်ႉထမိူင်းတႆးလႆႈယဝ်ႉ။  

လွင်ႈလႆႈမႃးႁဵၼ်းဢဝ်ၸုမ်ႈၶူး B.A လိၵ်ႈလူင်

ၸၼ်ႉၸွမ်ပုတ်ႉထမိူင်းတႆးၼႆႉ ပဵၼ်ၸၼ်ႉၸွမ်ၸၢဝ်းပုတ်ႉ ဢၼ်ပူၵ်းတင်ႈၼႂ်းမိူင်းတႆး
ဢွၼ်တၢင်းသုတ်းလင်ၼိုင်ႈ။ ၸၼ်ႉၸွမ်ပုတ်ႉထလင်ၼႆႉ ၸဝ်ႈၶူးမေႃလူင် ၶမ်းမၢႆ ထမ်ႇမသႃႇမိ ဢွၼ်ဢဝ်တပေးတၵႃႇသေလႄႈ တႄႇတင်ႈဝႆႉ ၼႂ်းပွၵ်ႉၽြႃးၶၢဝ် ဝဵင်းလူင်တူၼ်ႈတီး မိူဝ်ႈပီၶရဵတ်ႈ2014။ ၼႂ်းၸၼ်ႉၸွမ်လင်ၼႆႉ မီးဝႆႉၶူးမေႃသွၼ်လူင်လႄႈ လုၵ်ႈႁဵၼ်းၶဝ် ၼႂ်းမိူင်းၼွၵ်ႈမိူင်းၼမ်သေ လႆႈပူင်သွၼ်ဝိၶျႃးၸေးမဵဝ်း မိူၼ်ၸၼ်ႉၸွမ်ပုတ်ႉထတၢင်ႇမိူင်း။

လိူဝ်သေဝိၶျႃးၸိူဝ်းၼၼ်ႉ သမ်ႉမီး ဝိၶျႃးၽၢႆႇလိၵ်ႈလူင်ထႅင်ႈ။ လွင်ႈလႆႈမီးဝိၶျႃးလိၵ်ႈလူင်ၼႆႉ ၸဝ်ႈၶူးမေႃလူင် ၶမ်းမၢႆ ထမ်ႇမသႃႇမိ လႆႈၵွႃႇႁူႉႁၼ် လွင်ႈၸၼ်ႉၸွမ် ဢွၵ်ႉသၽူတ်ႉ မိူင်းဢိင်ႇၵလၼ်ႇ ၽုၺ်ႇသဵၼ်ႈတၢင်းပၼ် ၵူၼ်းၸိူဝ်းဢၼ်ဢႃႇယူႉယႂ်ႇ မႃးၶိုၼ်ႈႁဵၼ်း ဢဝ်ၸုမ်ႈၶူး။ မၼ်းၸဝ်ႈၵွႃႇႁၼ်ၸိူင်ႉၼၼ်သေယဝ်ႉ ၸင်ႇဝူၼ်ႉမႅၼ်ႈထိုင် ၸဝ်ႈၸရေး ၶဝ် ၸိူဝ်းပဵၼ်ၽူႈပွင်ၵၢၼ်သႃႇသၼႃႇ ၸွမ်းဝၢၼ်ႈၸွမ်းမိူင်းႁဝ်းလႄႈ ၽူႈသူၼ်ၸႂ်လိၵ်ႈ လူင်ၶဝ်သေ ၸင်ႇမႃး တင်ႈႁွင်ႈၵၢၼ်လဵပ်ႈႁဵၼ်းလိၵ်ႈလူင် တီႈၸၼ်ႉၸွမ်ပုတ်ႉထမိူင်းတႆး
မိူဝ်ႈပီ 2019။ တႄႇဢဝ်ၼၼ်ႉမႃး ႁွင်ႈၵၢၼ်လဵပ်ႈႁဵၼ်းလိၵ်ႈလူင် လႆႈပိုတ်ႇႁပ်ႉလုၵ်ႈႁဵၼ်းသေ မိူဝ်ႈလဵဝ်မီးဝႆႉ လုၵ်ႈႁဵၼ်းသင်ႇၶ ၸဝ်ႈၸရေးၸၢႆး/ယိင်းၶဝ် ဢွၼ်ၵၼ်ၶိုၼ်ႈႁဵၼ်းၽၢႆႇလိၵ်ႈလူင်ဝႆႉ တၢင်းၼမ်ယဝ်ႉ။

တႃႇတေပူင်သွၼ်ပၼ် လိၵ်ႈထမ်းၸုမ်းၶူး B.A
လိၵ်ႈလူင်ၼႆႉ မီးဝႆႉၶူးသွၼ်ၸဝ်ႈသင်ႇၶလႄႈ ၶူးသွၼ်ၵူၼ်းႁိူၼ်း။ ၶူးသွၼ်ၸိူဝ်းၼႆႉၸမ်ႉ ပဵၼ်ၽူႈဢၼ်လႆႈၸွမ်း  ၽၢႆႇၵၢၼ်ႁဵၼ်းသင်ႇၶ သေဢမ်ႇၵႃး လႆႈသွၼ်ႁဵၼ်းဢဝ်ၸွမ်းလၢႆးပိူင်သွၼ် ဢၼ်ဝႆႉလုၵ်ႈႁဵၼ်း ပဵၼ်သူၼ်ၵၢင် ၼၼ်ႉမႃးလႄႈ ပဵၼ်ၶူးသွၼ်ၽူႈလူင်ႉလႅၼ်ႇ ၽၢႆႇသွၼ်ႁဵၼ်းယူႇယဝ်ႉ။ ၵွပ်ႈၼၼ်လႄႈ ၸၼ်ႉၸွမ်ပုတ်ႉထမိူင်းတႆး ယုမ်ႇယမ်ၼၵ်းၼၵ်း ၼႃၼႃဝႃႈ “လွင်ႈသွၼ်ႁဵၼ်းဢဝ်ၸုမ်ႈၶူး B.A လိၵ်ႈလူင်ၼႆႉ တေၽိူမ်ႉထႅမ်ပၼ်ၼမ်ႉၵတ်ႉ လုၵ်ႈႁဵၼ်းၶဝ်လႄႈ တေပဵၼ်ၽွၼ်းလီ ပုၼ်ႈတႃႇပုတ်ႉထသႃႇသၼႃႇ ယႂ်ႇၼမ်ယူႇ” ၼႆယဝ်ႉ။

ႁူဝ်ၶေႃႈၵၢၼ်ႁဵၼ်းတႃႇၸုမ်ႈၶူး B.A လိၵ်ႈလူင်

တႃႇႁႂ်ႈပဵၼ်လွင်ႈၸွႆႈထႅမ် လုၵ်ႈႁဵၼ်းၶဝ်ၼၼ်ႉ ၸုမ်ႈၶူး B.A
ၼႆႉ မီး (11) ဝိၶျႃး ဢၼ်တေ လႆႈႁဵၼ်းဢဝ် မိူၼ်ၸိူင်ႉၼင်ႇၼႄဝႆႉ ပႃႈတႂ်ႈၸိူဝ်းၼႆႉယဝ်ႉ-

1.    လဵပ်ႈႁဵၼ်းလွင်ႈလိၵ်ႈလူင် လႄႈ ၽိင်ႈလိၵ်ႈလူင်

2.    လၢႆးတႅမ်ႈႁေႃးလိၵ်ႈလူင်

3.  ထၢတ်းသၢင်လွၵ်းလၢႆးတႅမ်ႈလိၵ်ႈလူင်

4.   ၵၢၼ်ၵမ်ႇမထၢၼ်း ၼႂ်းလိၵ်ႈလူင်

5.    ၼႄႉၼမ်း ထမ်းပိတၵတ်ႈ

6.    ဢၽိထမ်ႇမႃႇ တႃႇၸႂ်ႉၵူႈဝၼ်း

7.     ၽႃႇသႃႇပႃႇလိ

8.    ပိုၼ်ႉထၢၼ်ဢင်းၵိတ်ႉ

9.  ပိုၼ်းပုတ်ႉထသႃႇသၼႃႇထေႇရဝၢတ်ႈ

10.  ပိုၼ်းပုတ်ႉထသႃႇသၼႃႇတႆး

11.   ဢႃႇယုဝေႇတ ၸိူဝ်းၼႆႉယဝ်ႉ။

ဝိၶျႃးၸိူဝ်းၼႆႉ ပဵၼ်ဢၼ်လမ်ႇလွင်ႈ တႃႇၼႂ်း ၸၢတ်ႈပၢၼ်ၵူၼ်းတေႉတေႉယဝ်ႉ။

ၽႂ်တေတၢင်ႇလဝ်ႈ ၶဝ်ႈပဵၼ်လုၵ်ႈႁဵၼ်း ၸုမ်ႈၶူး B.A လိၵ်ႈလူင်ၼႆႉလႆႈ

တႃႇတေၶဝ်ႈသွၼ်ႁဵၼ်းဢဝ် ၸုမ်ႈၶူး B.A လိၵ်ႈလူင်လႆႈၼႆႉ ႁႂ်ႈပဵၼ်ၽူႈဢၼ်လူင်ႉလႅၼ်ႇ လိၵ်ႈလူင်လႄႈ ၽိင်ႈလိၵ်ႈလူင်၊ မီးၼမ်ႉၵတ်ႉတႅမ်ႈလႆႈ လူလႆႈလိၵ်ႈလူင် ဢမ်ႇၼၼ် လိၵ်ႈ
ဢေႃးၽႃႇမင်ႇၵလႃႇ။ လိူဝ်သေၼႆႉ ႁႂ်ႈပဵၼ်ၽူႈဢၼ်မေႃတႅမ်ႈ မေႃလူ လိၵ်ႈမၢၼ်ႈဢၼ် ၵပ်းၵၢႆႇလူၺ်ႈ လွင်ႈပုတ်ႉထၽႃႇသႃႇ ၸိူဝ်းၼႆႉယဝ်ႉ။

ပိူင်ထတ်းၼမ်ႉၵတ်ႉလုၵ်ႈႁဵၼ်း

ပိူင်ထတ်းလုၵ်ႈႁဵၼ်းဢၼ်ၼႆႉ ၸၢင်ႈႁဵတ်းႁႂ်ႈလုၵ်ႈႁဵၼ်းၶဝ် မီးၼမ်ႉၵတ်ႉ မေႃလူမေႃတႅမ်ႈ
ၽၢႆႇ လိၵ်ႈလၢႆး။ ၼႂ်းပိူင်ထတ်း ၽၢႆႇလဵပ်ႈႁဵၼ်းလိၵ်ႈလူင်ၼႆႉ ပႃးဝႆႉလွင်ႈႁုပ်ႈၵႅပ်ႈလိၵ်ႈ၊ လွင်ႈတႅမ်ႈ ဢႅတ်ႉသေးပွတ်း၊ လွင်ႈတႅမ်ႈဢႅတ်ႉသေးယၢဝ်း၊လွင်ႈၶိုၼ်ႈႁွတ်ႈ ပၢင်သွၼ်ၵူႈဝၼ်းလႄႈ လွင်ႈတႅမ်ႈတွပ်ႇလိၵ်ႈ ၸိူဝ်းၼႆႉယဝ်ႉ။ ၼႂ်းပိူင်ထတ်းၸိူဝ်းၼႆႉ လွင်ႈတႅမ်ႈတွပ်ႇလိၵ်ႈ ၸမ်ႉ ပဵၼ်တႃႇဝိၶျႃးပႃႇလိ လႄႈ ဢိင်းၵလိတ်ႈၵူၺ်း။